Una Señora Fiesta

El 17 d’agostu ye la fecha escoyida pa la segunda edición de ‘Una Señora Fiesta’. Si l’añu pasáu yá foi una xornada preciosa cola presencia de más de 500 persones y la participación de xente tan prestosa como Xeitu, Petit Pop, Carlos Barral, San Jerónimo, Violeta Nureyev, Julio Robert DJ o yo mesmu baxu l’a.k.a. Fayuela de Sangre, anguaño van resgásenos les comisures llabiales de rir y les rodíes y trapecios de baillar.

Esta edición va tar estremada en dos espacios y tiempos (diferenciación espacio temporal normal, nada rollu Christopher Nolan):
· Dende les 12h (de baldre) nel espaciu “La Meredal” vamos tener la xornada diurna cola so paella popular de Gallardo, el cuscús vexetarianu por Con-Fusión, la so charanga picante, los xuegos tradicionales, un cursu de baille al cargu de Xeitu, el so concursu de pic-nics, poesía, los baños nel ríu, los revolcones pol prau, los culinos y culetes,… Tradición, diversión y modernismu xuníos.
· A partir de les 21h (previu pagu) y nel espaciu “La Vilortera” va empezar el nuesu festival coles maraviyosa actuaciones de Xaime Martínez, Baiuca, Niño de Elche y Meneo. Bailles, perreos, arte y horterismo baxu les estrelles piloñeses hasta que’l cuerpu aguante.

La entraes yá tán a la vienta en: musikaze.net/unasenorafiesta, asina que más vale que vaigas faciéndote cola tuya porque depués escósense y quedes coles ganes, y ye que ¡nun hai namás murnia nesta vida que nun faer daqué que quies por duldar y duldar!

Señores, vaigan faciendo los estiramientos oportunos, ¡nun queremos mancaes en USF19!
¡QUÉ GANES!

Mil millones de gracies al Ayuntamiento de Piloña, Radio 3, Cerveza Ordum, Sidra de Asturias DOP, Sidra Viuda Angelón, Con-Fusión, Videostudio, Casa Cueto, Bar Vegarrionda, Casa Blanca, Yebio, Seis Impresión Digital y Studio Llunik.<3

 

 

@Studio Llunik

@Studio Llunik

 

@Videostudio